Романы, повести, стихи Марата Кабирова
стихи о любви на татарском

Шигырьләр


    Дусларың белән бүлеш:


     Сер


    Ничә еллар беләм. Син, барыбер,

    Минем өчен бетмәс сер, дисең.

    Никадәрле мине беләсең син,

    Шулкадәрле мине белмисең…


    Мин үзем дә әле үземне бик

    Тулысынча белеп бетермим…

    Бер карасаң, бәхет китерәм мин,

    Бер карасаң, берни китермим.

    Бер карасаң, бик тә акыллымын,

    Бер карасаң, артык тилемен…

    Бер карасаң…

    Тик бер карау өчен

    Туган кеше мени инде мин?!


    Мин бер карар өчен яшәмәдем,

    Бер карама миңа, мең кара.

    Меңәр тапкыр меңнәр карасаң да

    Ачылырга торган сер кала.


    Ничә еллар беләм, син, барыбер,

    Минем өчен бетмәс сер, дисең…

    Ничә еллар мине белсәң дә син,

    Ничә еллар мине белмисең…

    1998 


    Кичер мине


    Беләм…

    Ерак китә алмасымны беләм

    Синең рәнҗеш үпкәләрең белән…

    Ачуланма миңа, үпкәләмә,

    Гафу ит син мине, зинһар, кичер

    Җилләренә бөгелмәгән өчен,

    Давылына җиңелмәгән өчен…


    Бөгелеп-сыгылып алган ягымлылык,

    Җиңелүләр биргән җиңеллек

    Читләп үтте.

    Мин — җиңүләр өчен.

    Авырлыктан башка җиңү юк.


    Мин үземә үзем патша булдым, 

    Мин үземә үзем кол булдым.

    Көрәшләрдән арып егылмадым,

    Җиңүләрдән арып егылдым.

     

    Җиңеллекләр эзләү кирәк булган,

    Җиңеллекләр! Түгел җиңүләр…

    Белмәгәнмен шуны һәм белергә

    Теләмәгәнмен дә мин, юләр.


    Беләм…

    Ерак китә аласымны беләм

    Үзем сайлап алган юлым белән.


    Ачуланма миңа, үпкәләмә

    Җиңеллектә яшәтмәгән өчен.

    Газапларны үзем җиңәрмен мин,

    Көрәшләрне, җиңүемне кичер.

    Иң бәхетле чакларымны кичер.

    1998 


    Х х х


    Мин кайчандыр синең күңелеңдә

    Сөю дигән учак кабыздым.

    Янды учак, ләкин түзәлмәде

    Зәһәренә җилнең-давылның.


    Канны кайнатудан әкерен генә

    Җанны җылытуга ул күчте.

    Һәм төтенгә калды юл чатында

    Хуш мәңгегә дигән кул төсле.


    Төтеннәрнең аръягында калды

    Иң бәхетле, татлы минутлар.

    Ул минутлар кабатланмас инде,

    Кабат янмас инде ул утлар.


    Шул чакларны кайтарасым килә,

    Могҗизалар килә табасым..

    Миңа бары синең утлар кирәк,

    Кирәк түгел утның яңасы.


    Могҗизалар көтәр чагым үткән,

    Могҗизалар көткән чакларым.

    Үткәннәргә борылып карый-карый,

    Киләчәккә киткән чакларым…

    1998



стихи о любви на татарском - фото
Рейтинг@Mail.ru Яндекс.Метрика