Марат Кәбиров — юбилей кичәсе турында
Бу иҗат кичәсе өчен мин бик борчылган идем. Беренчедән, үткәреп өйрәнгән нәрсәм түгел. Казанга күчеп килгәннән бирле хәтта бер очрашу да уздырганым булмады. Ул арада халык белән аралашу формалары үзгәреп беткән. Икенчедән, бик уңайсыз вакыт туры килде. Ураза чоры, ун көнә сузылган май бәйрәме, Казандагы фаҗига, матәм көне… Хәтта адәмчә реклама бирерлек тә мөмкинлек булмады.
Чакырылган артистларымның да эш графигы тыгыз вакыт иде. Айдар Галимов, мәсәлән, самолет белән килде, чыгыш ясагач самолет белән китте. Ришат Төхвәтуллин Уфадан кайтып чыгыш ясады да Бәләбәйгә юлланды. Данир Сабиров та юлдан кайтып юлга кузгалды. Нәфкать Нигъмәтуллин да… Алар баш тартса да берни әйтеп булмый иде. Ләкин аларның берсе дә сүземне екмадылар. Килделәр. Чыгыш ясадылар. Халыкны әсир иттеләр. Рәхмәтем чиксез.
Юбилей кичәсе булгач, котларга теләүчеләр дә күп булды. Башкортостаннан да, Татарстаннан да. Илештән якташларым да килде. Кыскача гына чыгыш ясасалар да кичә озакка сузылды. Мин үземнең чыгышларымны кыскартып, әйтер сүзләремне әйтми калырга мәҗбүр булдым.
|
Игътибар!!! Түбәндәге русча сылтанмалар - реклама бирүчеләр сайтына илтә. Аларга басып сайтларны ачсагыз, авторга шушы сәхифәне яхшырту өчен бераз акча килә, ә сез бернәрсә дә югалтмыйсыз. Сезнең өчен бу бер тиен дә тормый... |
Тик мин канәгатьмен. Зурладылар. Иҗатташ дусларыма рәхмәт! Дүрт сәгать буена урыныннан да кузгалмыйча түзеп утырган тамашачыларыма, иҗатыбызны яратучыларга рәхмәт. Барыгызга рәхмәт!
Бу кичә турында Инстаграмда да, Фейсбукта да, Вконтактеда да башка социаль челтәрләрдә дә фикерләр булды. Ә рәсми язмаларны шушы сылтанмалар буенча укый аласыз.
Кичәнең видео язмасы ТНВ каналыннан күрсәтеләчәк. Вакыты җиткәч, бу хакта безнең сайтта да хәбәр булыр. Күзәтеп барыгыз.
